WHAKAARO HURITAO 25/6/21

 

• He aha aku akoranga hei āwhina i taku mārama atu ki te ariā ako me te kaupapa o Manaiakalani?

• Kei te whanake haere te mōhiotanga ki roto i ahau, kia rerehua ngā mahi ki ngā tamariki (engari kia kaua e haukerekere rawa ngā mahi ki ngā karu). Hei tauira, ahakoa he rawe ngā gifs ki ngā tamariki (me au hoki), kia kaua e kaha whakamahi, nā te mea ka mātaki kē ngā ākonga i ngā gifs, ā, e kore pea e aro ki ngā mahi. Ākene pea he pōtatutatu kē. Kia kaua hoki e kī rawa te paetukutuku ki ngā momo mahi KATOA - ko ngā marau matua o te akomanga te mea nui (pāngarau, reo matatini). Hangaia tētahi paetukutuku motuhake mō ērā atu kaupapa (Hākinakina, aha rānei).

• He aha aku akoranga hei whakawhanake i te ngaiotanga,  i taku māia, i taku kakama, i te rere rānei a te mahi?

• I ako mātou me aha mehemea ka tae atu ngā tākupu "spam", me ngā tākupu kino ki ngā rangitaki. Ko tētahi atu whakaaro anō kua puta mai ki ahau, ki te whakaako hoki ki ngā tamariki kia kaua e pēhi i ngā honongaitua ka puta mai i ngā tākupu.

• He aha aku akoranga kia tukua, kia tohaina atu ki āku ākonga?

•   Te hanga pātene honongaitua; ngā whakaaro e hāngai ana ki te rerehua o ngā mahi (hei tauira, kia rua noa ngā momotuhi i runga i te whārangi kōtahi; kia āta whakaaro hoki mō ngā kara; kia kaua e kaha whakamahi i ngā gifs i roto i te mahi kōtahi).

• He aha aku akoranga hei whakawhanake i taku māia, i taku kakama, i te rere rānei a te mahi ki taku ao whaiaro?

• Kore kau pea. I roto i taku ao whaiaro, kāore anō au kia tino ruku ki tētahi kaupapa ao matihiko. INA ruku atu ahau (hei tauira, he paetukutuku mō te whānau), he maha rawa atu ngā akoranga!!

DFI 25/6/21

 

I te rā nei i whāi wā mātou ki te tutu ki ngā paetukutuku (pāia!!!!) Ko tāku tino hiahia i te rā nei, ko te hanga pātene anō hei honongaitua ki ngā rangitaki ākonga. Ko taku whakaaro, kia hangaia me ā rātou whakaahua polyline. He mahi tino nui (ā, ko te raru, kāore anō ētahi kia whakaoti, pai kare!!!), engari anei tētahi kua oti kē i ahau te hanga. 

NGĀ PAETUKUTUKU I HANGAIA E AU I TE RĀ NEI

 

WHAKAARO HURITAO 11/6/21

He aha aku akoranga hei āwhina i taku mārama atu ki te ariā ako me te kaupapa o Manaiakalani? 

I ako ahau e pā ana ki te hanga paetukutuku motuhake mā ia marau, kia kaua e kīkī rawa te paetukutuku kōtahi ki ngā marau rerekē. He māmā ake hoki te whakatere. I ākina hoki mātou kia tohatoha tātou, ngā kaiako Māori, ki a tātou anō (kia kaua e noho ā-kura noa).

He aha aku akoranga hei whakawhanake i te ngaiotanga, i taku māia, i taku kakama, i te rere rānei a te mahi?

Ko Publisher taku tino taupānga, engari me whakaKūkara ahau i aku rauemi Publisher kia taea te whakauru ki tētahi paetukutuku. Kua whakaako ahau i ahau anō ki te tīni i ngā rauemi Publisher hei pikitia (engari me tīni i ia pikitia, he āhua hōhā tērā). Kāore e kore he huarahi pai ake/tere ake rānei, māku e rangahau atu. 

 He aha aku akoranga kia tukua, kia tohaina atu ki āku ākonga?

Ngā tapanga rangitaki (blog labels), kia māmā ake ai te kite i ngā mahi e hāngai ana ki ngā marau rerekē (kāore anō a Whakapono kia tīmata ki te mahi rangitaki).

He aha aku akoranga hei whakawhanake i taku māia, i taku kakama, i te rere rānei a te mahi ki taku ao whaiaro?

Tērā pea ka hangaia ētahi paetukutuku mō ngā kaupapa whānau? (Kapa Haka/Waiata/Whakapapa, e aua:))